拍拖耐左， 都唔好唔記得送下小禮物、攪下小驚喜啊！ 唔懶得架！
<應承我 拍拖耐左都唔好偷懶呀。>
尋日同好朋友行街個陣我問佢:「就黎情人節啦喎，買左禮物俾你男朋友未呀？」
「未呀，都唔知送乜，一齊左咁多年，乜都送過哂啦。」
「哦...咁你地今年有無行年宵呀？」
「冇呀，佢話又多人又迫 賣埋哂d無聊野，唔想去喎。」
「我記得你地年年都去架。」
「拍拖耐左係咁架啦...兩個都懶哂。」
唔知你地有無覺得呢段對話似曾相識
我相信好多人都體會過呢種感覺。
兩個人拍拖耐左，好多野都會同最初拍拖個陣唔同:
以前傾電話傾兩三個鐘都仲有傾唔完既話題,而家可能講唔夠五分鐘就想收線。
「喂 做緊乜呀？」
「食緊飯囉。」
「食乜野呀？」
「叉燒飯。唔講住啦，仲有好多野做，放工打俾你啦 乖。」
收線
以前放假出街會諗好多節目，去邊度郊遊 去邊度食飯 去邊度睇戲;而家可能寧願留係屋企，落樓下茶餐廳食個炒飯就算。
其實諗番轉頭緊係唔實際，熱戀期過左就係會慢慢變得平淡。
記得有個男仔同我講過 當男仔認定左一個女仔係可以細水長流咁走落去既時候，佢地會好自然懶左，唔會好似一開始咁成日氹個女仔;但咁樣唔代表佢無以前咁愛你 只係當左你係屋企人，所以態度就自然變得隨便左。
但係係呢個時候 女仔就永遠會向相反方向諗，佢會覺得個男仔變左，無以前咁鐘意 咁緊張自己，佢一定係變左！
男同女諗既野有時真係可以好唔同。
但記住無論點都好，一段感情始終需要兩個人去維繫，你間唔中氹下讚下對方，佢就算表面扮無野 其實內心都會甜絲絲架。
其實女仔最在意既唔係你情人節點同佢慶祝 送咩禮物俾佢 帶佢去邊食飯。佢地重視既係平日你點對佢，如果你平時都好錫佢既話，我相信 無論你畫一張咭定係送一枝花俾佢，佢都一樣會好開心。
唔好怕老土，唔好怕肉麻，多d同佢講「我愛你」，你講多幾次佢都會聽唔厭。
記住唔好懶呀❣
＿＿＿＿＿＿＿＿＿＿＿＿＿＿＿＿
IG: genie1184
FB: 空姐發夢日記 A daydreamer 's diary
Search